Psa 55 | NdeIBE | STEP | Kumqondisi wokuhlabela. Kutshaywa iziginci. Imasikili kaDavida. Lalela umthandazo wami, O Nkulunkulu, ungafulatheli isikhalo sami;

Psalms 55

Kumqondisi wokuhlabela. Kutshaywa iziginci. Imasikili kaDavida.

1 Lalela umthandazo wami, O Nkulunkulu, ungafulatheli isikhalo sami;

2 ngizwa ungiphendule. Imicabango yami iyangikhathaza, ngididekile

3 ngelizwi lesitha sami, lokunyonkolozwa ngababi; ngokuba bangibangela izinhlupho bangithuka bethukuthele.

4 Inhliziyo yami iyatshiseka ngaphakathi kwami; ukwesaba ukufa kuyangiqinela.

5 Ukwesaba lokuthuthumela sekungihlasele; isithuli sesingigabhela.

6 Ngathi, “He, aluba ngangilamaphiko njengejuba! Ngangizaphapha ngizoziphumulela kude.

7 Ngangizabaleka ngiye kude ngiyohlala enkangala;

8 Ngangizaphanga ngiye enqabeni yami, kude kwesikhukhula lesiphepho.”

9 Sanganisa ababi, O Jehova, sanganisa ukukhuluma kwabo, ngokuba ngibona udlakela lengxabano edolobheni.

10 Emini lebusuku bayacathama emidulini yalo; umona lenzondo kugcwele lapho.

11 Imimoya yokubhidliza yiyo esibusa; izisongo lamanga akusasuki emigwaqweni.

12 Aluba ngithukwa yisitha ngingakubhensela lokho; aluba ongizondayo engivukela ngingamcatshela.

13 Kodwa nguwe, umuntu njengami, umkhula wami, umngane wami oseduze,

14 engake ngaba lobudlelwano obukhulu laye lapho sasihamba ndawonye labanengi endlini kaNkulunkulu.

15 Yekela ukufa kuzijume izitha zami; yekela bagqitshelwe bephila engcwabeni, ngokuba ububi buhlezi khoxo phakathi kwabo.

16 Kodwa ngiyambiza uNkulunkulu, uJehova angisindise.

17 Kusihlwa, ekuseni lemini ngiyakhala ngisosizini, yena uyalizwa ilizwi lami.

18 Uyangihlenga ngingakalimali kuleyompi engihlaselayo, loba bebanengi abaxabana lami.

19 UNkulunkulu esesihlalweni sobukhosi lanininini, uzabezwa abachithachithe abantu abangaguqukiyo ezindleleni zabo njalo abangamesabiyo uNkulunkulu.

20 Umkhula wami uyabahlasela abangane bakhe; wephula isivumelwano asenzayo.

21 Inkulumo yakhe ibutshelezi njengolaza, kodwa kulempi enhliziyweni yakhe.

22 Yethula iziswelo zakho kuJehova yena uzakusekela; akazukuyekela abalungileyo bawe.

23 Kodwa wena, Nkulunkulu ababi uzabawisela egodini lokungcola; abantu abomele igazi njalo abakhohlisayo kabasoze bayiphile ingxenye yezinsuku zabo. Kodwa mina, ngithemba kuwe.